KOMISI IV DPRD Bali Susrusa Pisan Melanin Basa Bali
04.25
Mawiwit
saking pidabdab mahasiswa IHDN Dénpasar miwah IKIP PGRI
Bali sané duk 15
Desember 2012 ngrauhin Kantor DPRD Provinsi Bali, kaénterang antuk Ketua Aliansi Peduli
Bahasa Daerah Se-Bali, Komisi IV DPRD
Bali sané kamanggala antuk I Nyoman Parta, S.H. susrusa pisan mélanin bahasa Baliné. Para mahasiswa rauh ka Gedung DPRD Bali kasarengin antuk tigang diri dosen basa Bali:
(1) Drs. I Wayan Sugita, M.Si. (IHDN), titiang, Dr. Drs. I Nyoman Suwija, M.Hum. (IKIP PGRI Bali), miwah Dr. Drs. Ida Bagus Rai Putra,
M.Hum. (Unud).
Pangrauh para
mahasiswané
kasanggra antuk makudang angga DPRD
Bali sareng Kadis
Pendidikan Pemuda lan
Olah Raga Provinsi Bali maosang
pasumenian para wagmi,
guru, praktisi, miwah
mahasiswa basa Baliné majeng ring nasib
paplajaran basa daerah Baliné sané ring Uji
Publik Kurikulum 2013 kasikiang ring mata
pelajaran Seni Budaya dan Prakarya. Aliansi Peduli Bahasa
Daerah Se-Bali sané kamanggala antuk
I Nyoman Suka Ardiyasa, S.Pd. ngwedar
daging pajantenan (pernyataan
sikap), sané teges pisan nulakin pangrencanan Kemendikbud RI sané karasayang némérang pabuatan daerah.
Kabaosang mungguing
pidabdab nyikiang basa Bali ka paplajahan Seni Budaya mapuara: (1)
paplajahan basa Baliné sakadi kaicalang,
(2) ngicalang paplajahan basa Bali
sampun nungkasin undang-undang, (3) ngwetuang pangirangan jam palajahan basa Bali, (4) nasib para pengemong jurusan Basa Bali pacang rered, (5) Rasa bangga krama Baliné madué Program S2 Basa Bali ring IHDN Denpasar taler rered, duaning irika para doktor miwah guru besar Basa Baliné kasikiang antuk Prof. Dr. Drs. Nengah
Dwija, M.Si. (Direktur Pascasarjana IHDN Denpasar) gumanti pacang ngembasang calon-calon dosén
Basa Bali sané
professional,
(6) kaonengan (minat) para yowana Baliné ngranjing ka jurusan basa Bali taler pacang rered.
Aliansi
Peduli Bahasa
Daerah se-Bali ngwedar daging
pikayunan sasampun nguratiang asil patemon para kaprodi Bahasa Daerah sajabag Indonesia ring Jogjakarta duk tanggal 12-13 Desember 2013. Sajaba punika, taler nguratiang dasar
hukum pangupapiran basa
daerah, inggih punika
(1) Penjelasan Pasal 36 UUD 45 indik
Pangupapiran Basa Daerah; (2)
Permendagri No. 40/2007
indik Pedoman Kepala Daerah ring pangupapiran basa daerah; (3) UU Sisdiknas
No. 20/2003, Pasal 37
ayat (1) indik Kurikulum Pendidikan Dasar lan Menengah sané patut madaging
paplajahan basa daerah, taler (4) Kongres Bahasa Bali I-VI
(1959-2011) sané ngrékomendasiang “Bahasa Bali wajib diajarkan di SD,
SMP, dan SMA/SMK”.
Malarapan daging
panuréksan indik pabuatan
ngupapira basa Bali pinaka mata paplajahan ring sekolah-sekolah,
metu raris pajantenan pikayun (pernyataan
sikap)
kadi puniki. “Aliansi Peduli Bahasa Daerah Se-Bali ngusulang ring Komisi IV DPRD Bali mangda nglanturang aspirasinyané, mapinunas ring
Menteri Pendidikan lan
Kabudayan mangdané
ring Kurikulum 2013, mata
paplajahan Bahasa Bali nénten ja katunggilang
ring
mata paplajahan Seni Budaya lan
Prakarya,
nanging karanjingang pinaka paplajahan niri, sané pateh
ring mata paplajahan siosan”.
Drs.
I Wayan Sugita, M.Si (IHDN) negesang
mungguing Bali madué
kautaman sané kabaos unik. Taksu Bali kasanggra antuk aksara, basa, lan sastra Bali.
Krama Baliné sané nénten midep mabasa Bali (alus) pacang nénten madué taksu ring maparajana Bali.
Para pejabat,
guru besar, akademisi siosan sané tedun ka masyarakat
mabusana adat Bali, jagi marasa alit, kirang wibawa (rendah diri) sangkaning nénten midep mabasa Bali. Tios ring para manggala (elite
politik),
guru wisésané sané waged/pascat
mabasa
Bali, pacang metu
wibawa ring ajeng parajanané. Duaning asapunika, Pemda Bali kapatut érang lan wirang ring kahuripan basa Baliné.
Rajeg Baliné nénten wantah ring baos kémanten.
Titiang, Dr. I
Nyoman Suwija, M.Hum. (IKIP PGRI Bali) ngwewehin, mungguing taksu jagat Baliné pacang tetep macahya ring para wisatawané yéning krama Baliné “eling” ring tetamian
lelingsiré, duaning Bali
ngumandelang séktor pariwisata budaya. Yéning budaya Baliné rered, pacang mapuara kaon
mantuk ring pariwisata Baliné. Yéning sayuakti pacang nyokong program “Rajeg Bali”, akah budaya Baliné (aksara, basa, lan sastrané)
nénten dados laliang. Mawiwit karanjingang muatan lokal Basa Bali warsa
1989 rauh ring SMA/SMK, para yowana
Baliné sayan ngakéhang kayun tur purun ngranjing ring jurusan Basa
Bali. Para yowanané nénten kémad malih maosang ragané mahasiswa basa Bali. Punika
sané mawinan rauh mangkin sampun
siyuan wénten lulusan kependidikan basa Bali sané sayaga manados guru basa
Bali. Yéning mangkin upami paplajahan basa Baliné nénten rajeg, jagi kabuat kija
para yowanané sané kayun mlajahin basa Bali? Sira jagi sumakuta (bertanggung
jawab) yéning basa Baliné sayan rered utawi kantos
padem? Mangkin
puniki, iraga risaksat sedek “Layah macarikan”. Tegesipun,
ajeng-ajengan akéh wénten, nanging waduké kluwén pisan. Sampun akéh wénten lulusan basa Bali, nanging alit-alité ring SD (utaminipun) kaajahin
basa Bali antuk guru sané nénten lulusan basa Bali. Dadosipun, para reraman sisiané rumasuk sané dados pejabat luhur sampun
sareng dados korban pendidikan, duaning okan-okan dané kaajahin basa Bali antuk
guru-guru sané nénten maderbé kaweruhan miwah kawagedan basa, aksara, lan
susastra Bali.
Dr.
Ida Bagus Rai Putra, M.Hum. negepin,
mungguing puniki waluya tonggak sejarah sané mabuat pisan ring pidabdab DPRD Bali. Iraga nénten pisan kocap dados nglaliang sejarah,
mungguing warsa 1978 wantah tonggak sejarah Embasnyané Fakultas sastra Universitas Udayanasané karesmiang oleh Presiden Soekarno. Duk punika, Fak. Sastra
Universitas Aérlangga
kawangun ring Bali, sané antuk Réktor
Poerbacaraka kabaos pinaka
kunci wasiat kanggén mungkah peti
khazanah budaya nasionalé sané wénten ring Bali.
Dékannyané (Prof. Dr. Ida Bagus
Mantra) labdakarya nuntun Fak.
Sastra Universitas Aérlanggané sané salanturnyané manados
Universitas Udayana, antuk pola
ilmiah pokok “Kebudayaan”. Samaliha, minab ta makasami jurusan basa lan sastra Baliné ring Bali karesmiang
pawangannyané olih Ida, duk Ida madeg Gubernur
Bali.
Perjuangan Aliansi Peduli Bahasa daerah se-Bali puniki kasanggra susrusa
pisan antuk Komisi IV DPRD Bali. Ring rahina punika taler manggalané (Bapak I Nyoman Parta, S.H.) masemaya jagi makta aspirasi punika rauh ka Pusat Kurikulum
Nasional ring Jakarta. Duk tanggal 20
Desember 2012, Pak Parta, Pak Gunawan (DPRD Bali) kasarengin antuk kekalih pejabat Dinas
Pendidikan Provinsi Bali, maweweh
titiang Dr. I Nyoman Suwija, M.Hum. (pawalian dosén bahasa Bali, miwah I Nyoman Suka Ardiyasa, S.Pd. (Ketua Aliansi) lunga ka Jakarta macunduk sareng pejabat
Pusat Kurikum dan Perbukuan Kemendikbud
RI. Duaning
nénten
puas ring pawarah-warah wiwit mata paplajahan basa Baliné
kasikiang ring Seni Budaya lan Prakarya, Manggala Komisi IV DPRD Bali ngundang Dané-dané ring
pusat mangda rauh ka Bali ngicenin bebeosan. Indik daging bebaosan sapangrauh
duta Puskurnas rahina Wrespati tanggal 17 Januari 2013 pacang uningayang
titiang ring galahé
siosan. Mogi-mogi ja nénten wénten kapiambeng.
0 komentar