Ngwangun Karakter Wangsa Antuk Seni Budaya

03.57

Pidarta mabasa Bali kawedar olih silih tunggil remaja putri sajeroning forum formal protokoler diés natalis IX lan wisuda X Institut Seni Indonésia (ISI) Dénpasar daweg rahina Saniscara lintang, pidarta sané ngambil téma “Ngwangun Karakter Wangsa Melarapan antuk Seni lan Budaya” punika naut uratian para tamiu sané jenek ring panggung Natya Mandala ISI Dénpasar. Tamiu sané rauh ngawit saking bacakan pejabat pemerintah, akademisi, seniman-budayawan miwah para wisudawan angob miragi pidarta Pradnya Larasari, siswi kelas X-2 SMA Negeri 3 Dénpasar.

Laras, sapunika dané ketah kasambat, dados pinaka Juara I Pidarta Bahasa Bali Tingkat SMP sajebag Bali puniki, karauhang ri kala pidarta resmi Réktor ISI Dénpasar, Prof. Dr. I Wayan Rai S., MA. Anak istri sané embas, 16 Désémber 1997 puniki kasudi nyinahang indik peranan generasi muda membangun karakter bangsa ring éra globalisasi.


Kekawitin antuk puja pengastuti om swastiastu, anak istri mimitan Banjar Babakan, Sukawati, Gianyar, raris nyelehin fénoména kesejagatan sajeroning pidartannyané. “Ring zaman globalisasi sané kabaos aor tan pawates puniki, saluwiran budaya saking dura negara sampun ngalimbak ring sajeroning jagat. Minab tan wentan jatma ring guminé nyidayang ngelidin kasejagatané punika. Taler ring sajeroning krama Baline. Kawéntenan kasejagatané punika, patut pisan iraga sareng sami ngwaspadayang padéwékané soang-soang. Para yowana, sané kasengguh sumber insani masa depan bangsa, mangda nelebang pikayun ngemit budaya luhur wangsané,” sapunika baosnyané nganggén ritme sané anut.


Laras ngawedar zaman globalisasi. “Makta ciri nénten becik ring parilaksana krama Baliné mangkin. Mangkin, akéh kramané nénten pati rungu mabalih ilén-ilén ring pura utawi ring balé banjar. Hiburan modéren sané munggah ring televisi, sayan naut manah para janané, bajang tua cenik kelih. Wayang kulit, contoh ipun, ri kala dumun dados balih-balihan sané akéh micayang piteket lan suluh agama, sayan-sayan rered kekutang panonton sané kapingon antuk si kotak ajaib televisi,” baosnyané nganggén intonasi inguh.


Nguntatin pidartannyané Laras metuéling iraga sareng sami mangda ngwangun karakter bangsa antuk kaasrian seni lan budaya luhur bangsa. “Ngatonang pamargin zaman globalisasi sané mangkin, ngiring sareng sami mulat sarira majalaran antuk think globaly, act locally: mapamineh global maparisolah lokal. Teges ipun, iraga patut madué wawasan global nanging sampunang lali ring warisan budaya lokal adi luhung leluhur,” dané negasang, raris kasambut tepuk tangan tamiuné.


Pidarta tan patéks sané kaunggahang olih pelajar putri SMA Negeri 3 Dénpasar punika prasida ngawinang tamiu sané rauh angob. Sesampun mapidarta, Laras katah nerima salam lan ucapan selamat, rumasuk aprésiasi tinggi saking para Guru Besar ISI Dénpasar, ISI Yogyakarta, ISI Surakarta, miwah Universitas Udayana. “Terimakasih, suksma, suksma,” sambramannyané sinambi makenyung. Bharatanatya

You Might Also Like

0 komentar

Popular Posts

Like us on Facebook

Flickr Images