BAPAK Mohammad Nuh, Menteri Pendidikan Nasional RI (2011:8-9) maosang mungguing kabangkitan wangsa, nénten pisan dados lempas ring sektor pendidikan. Karakter jadmané akéhan kawangun malarapan pidabdab pendidikan. Duaning asapunika, sajeroning ngwangun jadma sané wikan tur sumakuta (bertanggung jawab), banget pisan kaperihang pendidikan sané becik, makualitas. Taler kabaosang antuk Mohammad Nuh, kultur sekolah patut kawangun duaning karakter punika nénten ja wantah kawangun ring kelas, nanging kaiusin antuk saluir pagubugan (interaksi sosial). Wantah karakter inggil (unggul) sané pacang sida nincapang kahuripan wangsa. Pendidikan jagat druené patut prasida mawali, ngwangun karakter asli pinaka wangsa pejuang, tangguh, cerdas, cinta tanah air, santun, saha welas asih.

Manut Mohammad Nuh (Diknas:8), maiketan ring pendidikan karakter wangsa, wénten tigang lapis (konsep) sané patut kauratiang kadi asapuniki.

1) Tumbuhang sradha druéné mungguing iraga pakardin Widhi (mahluk Tuhan) mawinan iraga nénten pisan dados sombong, nénten dados nyapa kadi aku, sané mawinan sida saling percayain saha saling singgihin;

2) Ngwangun lan numbuhang karakter pangweruhan (keilmuan) sané banget katentuang antuk kepenasaran intelektual. Saking iriki pacang metu kreativitas lan produktivitas miwah inovasi sané banget nentuang daya saing sasamén wangsa;

3) Pendidikan patut sumanggup numbuhang karakter kecintaan lan kebanggaan pinaka wangsa Indonesia. Kecintaan kawangun malarapan rasa nruénang NKRI, saha kebanggaan kawangun saking sikap numbuhang tradisi budaya maprestasi (kontributif-positif).

Malarapan wirasa iwawu, raris metu pangaptin Mendiknas ring para guruné makasami mangda arsa pinaka aktor tetinutan (tauladan) sajeroning saluir widang ilmu sané kaemban lan kaajahin. Maiketan ring punika, sajeroning sekolah formal wénten patang faktor sané patut kaparipurnayang, inggih punika (1) materi ajah, (2) metode pengajahan, (3) kualitas guru, lan (4) kultur budaya sekolah sané inggil.

Pangaptiné punika medal duaning mangkin, wangsa druéné sedek ngarepin wicara serius, minakadi (1) Prasida ké wangsa puniki muputang wicara yéning mawali ka jati angga? (2) Patut ké kareredan puniki pinaka puaran rerednyané pendidikan karakter wangsa para yowanané? (3) Sapunapi tatacarané midabdabin pendidikan karakter punika? (4) Napi ké suang-suang paplajahan prasida kanggén nyisipang pendidikan karater wangsa?

Malarapan daging pamineh ba duur sida kabaosang mungguing tuntunan karakter sané kalaksanayang nénten ja ring ranah kognitif kémanten, nanging taler ring ranah afektif miwah psikomotorik. Bénjangan, tuntunan karakter nénten ja kakeniang ring kelas kémanten, nanging taler ring lingkungan, kulawarga, miwah masyarakat. Kategesang, pendidikan karakter nénten ja wantah pinaka pangajahan kémanten, nanging prasida manados budi daya ring para siswané.

Sajaba punika, pendidikan karakter nénten ja tanggung jawab pemerintah kémanten, nanging tanggung jawab makasami warga panegara druéné. Saluir widang kahuripan ring Indonesia, patut sareng pinaka motor tuntunan karakter wangsa. Mawiwit saking kulawarga, sekolah, lingkungan, taler media masa. Banget kaaptiang, media massa madué galah becik pisan sareng ngemban lan nglimbakang nilai-nilai pendidikan karakter. Tatujonipun, mangda generasi salanturnyané manados generasi sané tangguh, wikan, waged, wagmi, saha bakti ring Ida.

Wangun tuntunan karakter kalimbakang saking kurikulum sekolah, ngwangun kultur sekolah sané becik. Pendidikan karakter nénten ja wantah kaajahin ring papan tulis, nanging merluang pembudayaan. Pinaka gerekan nasional, pendidikan karakter nénten ja pastika patut marupa mata paplajahan, nanging risaksat angin (oksigen) sané kasusupang ring paplajahan lan budaya