Muatan Lokal “Basa Bali” Sampun Kapastikayang Olih Gubernur Mangku Pastika

03.58


Utsaha mikukuhin Paplajahan “Bahasa Bali” sané banget kasumenianin antuk para akademisi, praktisi, miwah mahasiswa Jurusan Basa lan sastra Bali ring sajebag jagat Bali sampun mapikolih. Mawiwit saking pikamkam Aliansi Peduli Basa Bali Sajebag Bali sané kamanggala antuk I Nyoman Suka Ardiyasa, S.Pd. kasanggra antuk para wagmi lan mahasiswa Basa Baliné ring Bali, prasida kalaksanayang pidabdab kadi puniki.
            Kapertama, duk rahina Sukra, 14 Désémber 2012 Aliansi sané nedunang tigang angga dosén maweweh sawatara 200-an mahasiswa ngrauhin Komisi IV DPRD Bali numusang daging pikayunan (pernyataan sikap) mungguing nénten terima (menolak) yéning muatan lokal Basa Bali katunggilang ring palajahan Seni Budaya lan Prakarya. Katunasin mangda DPRD Bali ngokasang indiké puniki ka Pusat Kurikulum Nasional.
            Kaping kalih, duk tanggal 20 Désémber 2012, Komisi IV DPRD Bali, Manggala Disdikpora Bali, wakil dosén lan Manggala Aliansiné ngrauhin Pusat Kurikulum lan Perbukuan Nasional ring Jakarta. Nanging nirguna, riantuk wantah kasanggra antuk Ibu Nanik sané nénten sida ngicenin pamutus. Irika I Nyoman Parta, S.H. masemaya jagi ngundang para manggala Pusat Kurikulum mangda rauh ka Bali ngicénin pawarah-warah indik wiwilan nunggilang muatan lokal basa daerahé ka Seni Budaya lan Prakarya.
            Kaping tiga, duk rahina Wrespati, 17 Januari 2013, rauh Bapak Drs. Ariantoni, M.Pd. saking Puskur Jakarta ka Bali ngicénin pawarah-warah kasanggra antuk Aliansi Peduli Basa Bali, Komisi IV DPRD Bali, para Réktor lan Kaprodi sané madué jurusan Basa Bali, para dosén, miwah 300-an mahasiswa, ring wantilan DPRD Provinsi Bali. Duaning taler nénten prasida ngembasang pamutus punapa-punapi, metu raris pararem pacang nunas baos Bapak Gubernur Bali.
            Kaping papat, duk rahina Sukra, tanggal 2 Februari 2013, Gubernur misadia nyangra pangrauh aliansi miwah para sesepuh lan manggala pateh kadi sané rauh ring DPRD Bali. Sawusan Manggala Aliansi Peduli Basa Baliné nyantenang nulakin (menolak) palajahan Basa Bali punika kasikiang ring Seni Budaya lan Prakarya, Gubernur Mangku Pastika ngicénin sembrama wecana sané sampun kasiagayang nganggén basa Bali alus. Pacutetan baos dané, riantuk kawikanin basa, aksara, lan sastra Bali pinaka akah budaya Baliné, indik paplajahan Basa Bali ring Bali sanistané tetep kadi sané sampun mamargi, 2 (kalih) jam per minggu, ngawit saking SD rauh ring SMA/SMK.
Ring acara saur-pitakén (tanya-jawab), titiang sané kaicénin galah kapertama. Duaning indik pinunas ngeninin muatan lokal Basa Bali sampun kadagingin, titiang matur pinunas asapuniki. “Duaning para yowana Baliné akéh pisan kayun, sampun tamat, saha kantun kuliah ring jurusan Basa Bali, mangda Bapak Gubernur lédang ngicénin aprésiasi (penghargaan). Titiang ajerih yéning terus-terusan tén wénten pengangkatan guru basa Bali, semangat para yowanané pacang sayan rered. Sapasira jagi andelang ngrajegang basa lan sastra Baliné? Para invéstoré? Wong dura negari? Doh para jagi sida mamargi. Titiang nunas Pak Mangku mangda sida nulad Jokowi. “Kalau saya terpilih kembali menjadi gubernur, saya akan mengangkat guru bidang studi Bahasa Bali di semua (1110) SD di Bali”. Bali sedek merihang pemimpin sané urati ring rakyat kecil (sané kayun urati ring budaya Bali). Rauh mangkin titiang miwah ida-dané sampun dados korban, riantuk nerima kémanten alit-alit druéné ajahina basa Bali antuk guru agama Hinduné sané (nénten lulusan basa Bali). Puniki sané mawinan dasar pangweruh basa Bali alit-alité kirang becik. Pacang banggayang terus-terusan sapuniki? Nglantur raris ring SMP miwah SLTA, akéh taler guru agama Hinduné ngajahin Basa Bali, kanggén negepin 24 jam per minggu. Napiké puniki manut ring profesionalismé guru sané kaulati? 
Galah salanturnyané kapica ring Prof. Dr. Nengah Duija, M.Si. sané ngusulang, duaning mlajahin basa Bali maweweh paplajahan aksara Bali, mangda kautsahayang paplajahan basa Baliné 3 (tigang) jam ngaminggu. Kalanturang olih Prof. Dr. Madé Tutib, M.Si. sané taler matur suksma, riantuk Bapak Gubernur sampun mikayunin antuk becik pisan basa Bali druéné. Wénten usul mabuat sané kawedar: “Anggén ngicenin apresiasi ring para yowanané sané jemet mlajahin agama lan basa Bali pinaka pangremba program Rajeg Bali, mangda Gubernur ngangkat penyuluh agama lan penyuluh basa Bali ring soang-soang désa Pakraman sajebag jagat Bali, antuk ngambil Rp 1.200,00 dana bantuan désa adaté nyabran awulan anggén ngajih penyuluh agama Hindu, taler Rp 1.200,00 anggén gajih penyuluh basa lan sastra Bali.
Dr. Ida Bagus Rai Putra, M.Hum., saking Fak. Sastra Unud taler ngusul, mangda Bapak Gubernur ngamedalang Instruksi Gubernur kanggén kekuatan hukum indik pamutus baos dané mikukuhin lan ngamanggehang palajahan Basa Baliné ring sekolah SD rauh SMA/SMK. Taler sareng DPRD-né sida maripurnayang Perda Prvinsi Bali No. 3 warsa 1992, indik Tuntunan  Basa, Aksara, lan Sastra Bali.
Prof. I Gst. Made Sutjaja, M.A. guru besar saking Fak Sastra Unud ngwewehin mungguing basa Bali sané kaangkén lokal jatinipun global pisan duaning akéh jadma duranegarané malajahin basa Bali. Nirdon pisan yéning i krama Bali ngaliang basa lan sastra Baliné. Taler dané madué pengalaman sering wénten pinunas dados pangajah basa Bali ring luar negeri. Puniki mangda kapikayunin sareng sami.
Panyawis Bapak Gubernur sapuniki. (1) Indik ngangkat guru basa Bali ring SD jagi kabaosang sareng Kadispora lan BKD Bali; (2) Indik ngicenin palajahan basa Bali 3 jam ngaminggu, taler pacang kabaosang; (3) Indik ngangkat penyuluh agama miwah basa Bali ring soang-soang désa pakraman kadagingin, nénten perlu ngambil jatah wantuan désa adat. Nanging pacang ngawit kalaksanayang warsa 2014; (4) Indik usulan mangda gubernur ngamedalang instruksi, malah dané masemaya pacang ngamedalang Keputusan Gubernur indik Paplajahan Basa Bali ring SD rauh SMA/SMK; miwah (5) Indik ngajahin basa Bali ring jadma dura Bali mangda para alumniné jemet taler mlajahin basa asing.
Para manggala, akademisi, praktisi, miwah mahasiswa Basa Baliné sané rauh duk punika, makasami sampun puas ring panampén lan uratian Bapak Gubernur. Maiketan ring indiké punika, kaaptiang pisan para kepala sekolahé ring Bali mangda tetep ngranjingang paplajahan basa Bali 2 (kalih) jam ngaminggu. Mogi-mogi kukuh bakuh, rajeg lestari basa lan sastra Baliné kantos ka wekas.

You Might Also Like

0 komentar

Popular Posts

Like us on Facebook

Flickr Images