Om Swastyastu

Inggih, matur suksma ring dané pangénter acara antuk galahé sida kapaica ring titiang. Ida dané sané wangiang titiang, Ibu-bapak para panuntun sané pisinggihin titiang, taler para sameton pamilet lomba mapidarta sané asihin titiang.

Angayubagia uningayang titiang majeng ring Ida Sang Hyang Parama Wisésa, duaning sangkaning asung kerta wara lugrahan-Ida mawinan titiang miwah Ida-dané prasida mapadu wedana sakadi mangkin. Ring galahé sané becik puniki titiang pacang matur samatra nganinin indik “Bhakti ring Guru Pangajahan”.

Inggih, Ida dané miwah para sameton sané kusumayang titiang, napi mawinan titiang ngambil murda kadi asapunika? Duaning ring pakibeh jagaté sané kabaos masa kali sengara kadi mangkin, sampun akéh jadmané nglaliang pangubakti ring sang kasinanggeh guru. Samaliha wénten sané purun langgana, piwal ring sang maraga guru mawastu kabaos alpaka guru.

            Ri tepengan panegara druéné kabaos aor tan pawates utawi wénten ring era globalisasi, patut karasayang mungguing ius utawi panglalah wisatawané sané kaon-kaon sampun makéh pisan sané mamurti. Punika sané mawinan tata krama kahuripan parajanané sampun karasayang sayan rered.

Kahuripan sané setata nguberin kasukertan, miwah kekuasaan sering nglaliang dresta kunané sané ngutamayang hurip pasuka-dukan. Kahuripan sané rumaket saha  ngingilang briuk sapanggul lan magotong-royong sampun sayan ngedohan. Kahuripan sané nginggilang pikayunan sagilik-saguluk salunglung sabhayantaka taler sampun sayan matilar.

            Akéh anaké maosang, moralitas parajanané sampun sayan-sayan rered. Punika sané mawinan jagat druéné kabaos keni krisis. Wenten krisis moneter, krisis ékonomi, miwah krisis multidimensi. Puniki mawinan karasayang kadi sayan rug jagaté sam. Pengangguran sayan ngakéhan, utang panagara sayan ngagegan, miwah suprémasi hukumé taler masladukan. Indiké puniki sané mawinan sayan-sayan  rered kapercayan rakyaté ring sang maraga guru wisésa. Sampun karasayang para pejabaté, akéh sané katibin krisis moral, setata ngrebutin kakuasan, nanging nénten yukti kayun mélanin rakyat.

            Kamanah antuk titiang, menawi nénten wénten pamargi tiosan sané patut titénin, sajaba digelis mawali ka jati angga druéné, mikukuhin dasar panegarané Pancasila saha nelebang daging ajahan agama, anggén mikukuhin kautaman kayun mabéla pati ring tanah pamijilan, ngrajegang budaya Baliné.

Inggih, ida-dané miwah para pamilet utsawa pidarta sané wangiang titiang. Sepat siku-siku pawangunané ring Bali wantah Tri Hita Karana, minakadi: Parhyangan, Pawongan, miwah Palemahan. Makasami parajanané patut prasida nunggilang pikayunan, nelebang ajahan agama miwah adat Baliné. Ring tata pawongan, iraga patut ngupapira kahuripan tresna asih ring sesamén mahurip. Maiketan ring tata pawongan puniki, agama Hinduné madué ajahan “Catur Guru”, minakadi guru rupaka, guru pangajian, guru wisésa, miwah guru swadhyaya.

Guru rupaka inggih punika sang maraga rerama, i aji kalih i biang utawi mémé-bapa. Sané kabaos guru pangajian, tan tios wantah para guruné sané mapaica aji kaweruhan ring sekolahan. Sané kaping tiga, guru wisesa inggih punika makasami jadmané sané pinaka prakanggé ring pemerintahan. Raris sané kabaos guru swadhyaya wantah Ida Sang Hyang Widhi Wasa.

Inggih, Ida dané sanamian sané pisinggihin titiang. Sané mangkin ngiring pikayunin! Sapunapi tata carané nyihnayang subaktiné ring sang maraga guru pengajian? Napi ké antuk ngaturang arta brana tetombokan? Kamanah antuk titiang nénten ja asapunika. Para guru pangajiané sampun ketah pinaka pahlawan tanpa tanda jasa sané nénten banget nguberin artabrana. Guru pangajiané pacang rumasa bagia yéning para muridé kayun jemet  malajah. Taler dané pacang marasa bagia yéning nénten wénten murid bandel, nénten wénten sané sering bolos, saha kayun tertib ri kala dané ngajahin. Pacang maweweh subagian kayun sang maraga guru yéning wénten tur akéh muridé jemet mapitakén ring materi ajah-ajahan sané kapicayang. Sajaba punika, yéning para muridé sampun satya nginutin sapituduh dané, majanten para guruné sampun risaksat kataur antuk artabrana ngebekin jagat.

            Inggih, ida-dané miwah sameton sami sané gumanti banget subaktinin titiang. Napi luir sané sampun aturang titiang i wawu, prasida kacutetang asapuniki. Para siswané patut subakti ring sang maraga guru duaning agung pisan iraga mautang yasakerti ring dané. Sangkaning guru wénten anak wikan sané dados dokter, polisi, presiden miwah sané lianan. Antuk punika, anaké sané nénten bhakti ring duru kabaos mirat dana, alpaka guru.

Inggih, wantah asapunika titiang prasida matur ring galahé sané becik puniki. Menawi ta akéh atur titiangé sané sisip, nénten lali titiang nglungsur agung rena pangampura. Inggih, puputin titiang antuk parama santih.

Om Santih, Santih, Santih, Om.