Linguistik

Matur suksma titiang mantuk ring dané pangénter acara. Ibu Lurah sané pisinggihin titiang; Para manggala, inggian dinas miwah adat sané wangiang titiang; Dané-dané prajuru miwah angga Seka Truni sinamian sané asihin titiang.  Om Swastyastu.

Pinih ajeng, lugrayang riin titiang ngaturang pangayubagia majeng ring Ida Sang Hyang Widhi Wasa mantuk ring pasuécan-Ida ngicénin iraga karahajengan mawinan prasida ngamiletin acara wanti warsa seka truni druéné wenginé puniki.

Ring wenginé sané becik puniki, titiang pinaka prajuru adat rumasa gargita dahat ring manah duaning kapaica galah mawirasa sareng alit-alit seka truniné makasami. Nénten lali titiang ngaturang suksmaning manah majeng ring para prajuru miwah krama seka truniné makasami santukan rauh mangkin puniki ton titiang setata prasida mapidabdab manut sesananing sang maraga wimuda, prasida ngwantu saluir pawangunan ring banjar miwah ring désa druéné. Punapa-punapi sané sampun katiténin lan kalaksanayang nénten naenan lémpas ring pangaptin titiang miwah para lelingsir lan krama banjar druéné iriki.

            Salanturipun, banget taler titiang mapinunas ring para angga saka truni sareng sami, mangda sumingkin kukuh nglaksanayang swadarma mangda prasida wekasan ngamolihang tetujon uripé manut kadi sané kaaptiang. Yéning anutang ring dasar pawangunan druéné iriki ring Bali, saluir pawangunan patut ngunutin tatwaning Tri Hita Karana. Luir daging katatwaning Tri Hita Karana sané patut telebin nénten ja tios kadi puniki.

1) Ring widang Parahyangan, sareng sami patut sayaga sareng ngwantu pawangunan genah-genah suci, minakadi pura-pura miwah genah suci sané tiosan.

2) Ring widang Pawongan, krama seka truniné patut sayaga ngremba pasuka-dukan ring sesamén manusa, inggin ring kulawarga, ring banjaran, miwah ring désa pakraman.

3) Ring widang Palemahan, sareng sami patut sayaga milet  ngupapira karesikan bhuwana agung, mawit saking tlajakan pakarangan, rauh ring sawewengkon desa pakraman.

Ibu Lurah, Bapak Kadus miwah Ida dané angga seka truni sané wangiang titiang. Sajaba sané sampun uningayang titiang iwawu, taler kaptiang pisan mangda angga seka truniné makasami bajeg ngamargiang swadarmannyané suang-suang. Yéning indiké puniki anutang ring sadaging awig-awig banjar adat druéné, patut sayaga maparilaksana kadi puniki.

1) Asiki, alit-alité patut mikukuhin pula-pali magama Hindu, ngamargiang titah Ida Sang Hyang Widhi, saha ngedohang raga ring saluir parilaksana sané nénten becik.

2) Kekalih, mangda setata sayaga sareng nyangga saurah-arih wewangunan banjar adat druéné ri kala ngupadi désa pakraman miwah dinas sané rajeg, santi, miwah sukerta.

3) Tetiga, setata sayaga mikukuhin baos Baliné “Sagilik- saguluk salung-lung sabayantaka, tur prasida paras-paros sarpana ya” ngamanggehang parsatuan miwah kesatuan.

4) Papat, setata mautsaha nincapang pangweruh, kawagedan, katatasusilan, miwah pangupajiwa.

Ibu Lurah, Para Manggala, miwah Ida-dané sinamian sané pisinggihin titiang. Wantah kadi punika titiang prasida mabahang atur ring galahé sané becik puniki. Ri pradéné wénten atur titiangé sané nénten manut ring arsa, mangda lédang Ida-dané ngampurayang. Pinaka pamuput atur, lugrayang titiang ngojarang parama santih.

Om Santih, Santih, Santih, Om.

Inggih, Para prajuru adat lan dinas sané banget wangiang titiang. Para panglingsir miwah sasepuh banjar adat miwah dinas sané pisinggihin titiang. Asapunika taler Ida-dané krama agung banjar sané

tresna asihin titiang.

Pinih ajeng lugrayang titiang ngaturang rasa pangayubgia majeng ring Ida Sang Hyang Widhi Wasa, duaning sangkaning asung kerta wara nugrahan-Ida, titiang miwah Ida-dané prasida manggihin karahjengan. Antuk punika, ngiring sinarengan ngojarang panganjali umat Om Swastyastu.

            Suksma banget aturang titiang mantuk ring kalédangan Ida-dané ngamiletin paruman druéné wenginé puniki. Sakadi kawedar ring dudonan acara paruman i wawu, unteng bebaosan sané jagi kabligbagang ring paruman puniki wantah indik “Pawangunan Balé Banjar” druéné. Sakadi sané sampun kauningin, sampun saking sué balé banjar druéné rusak rahat mawinan nénten dados anggén malih. Sakéwanten santukan rauh mangkin iraga durung madué dana/prabéa, ngiring mangkin baosang masareng-sareng.

            Sané mangkin banget pinunas titiang mangda Ida-dané prasida nyikiang pikayunan, pacang sayasa nglanturang pawangunan puniki, gumanti kasidan balé banjar druéné kawangun malih nganutin pawangunan aab jagaté kadi mangkin. Ngiring sareng sami prasida ngaremba pakaryané punika.

Ring galah paruman sané becik puniki titiang mamanah jagi ngadegang prawartaka utawi Panitia Pawangunan Balé Banjar. Ngiring mangkin baosang tutur judi angga kramané sané antes anggehang pinaka manggala miwah para angga pangwantunnyané. Mungguing sané patut judi utawi adegang, minakadi:

1)  Pangrajeg karya utawi ketua panitia

2)  Patajuh utawi wakil ketua

      3)  Panyarikan utawi sekrétaris

4)  Patengen utawi bendahara

5)  Makudang-kudang angga manggala baga (seksi-seksi).

minakadi: (1) baga molihang dana, (2) baga patukangan, lan (3) baga pangwantu.

Inggih, Ida dané sinamian. Sané mangkin ngiring kawitin antuk ngadegang pangrajeg karya utwi ketua panitia. Durusang medalang pikayunan, sapasira mangkin judi pinaka pangrajeg karya?

………… Ngadegang Pangrajeg Karya miwah Angga Panitia ……….

Inggih, Jero Mangku, Para Prajuru, miwah Ida-dané krama banjar sane banget wangiang titiang. Sasampun iwawu Ida-dané prasida ngadegang angga panitia, titiang ngaturang suksma banget utaminipun ring dané-dané angga panitia sané sampun kajudi iwawu. Pinunas titiang mangda Ida-dané sayaga jagi ngamargiang pakaryan pawangunan balé banjar druéné.

Sané mangkin durusang riin Ida-dané ngamedalang daging pikayunan, inggian indik pangapti ring panitia, pitakén tiosan utawi pangrencana ngawit makarya, indik tatacara mupulang dana, miwah sane lianan. Inggih durusang!

………………….........… Saur – Pitaken ………………………………

Ida-dané Anak Agung Banjar sané pisinggihin titiang. Yéning nénten wénten malih sané patut baosang rahinané mangkin, wantah kadi asapunika titiang prasida matur ngénterang paruman puniki. Menawi ta wénten sisip atur titiang, nénten lali titiang nglungsur gung rena pangampura. Ngiring puputin paruman druéné antuk ngojarang parama santih.

Om Santih, Santih, Santih, Om.

Dané Jero Bendesa Adat sané kaping singgihang titiang. Para Manggala Dinas miwah Adat sané pisinggihin titiang. Miwah Ida-dané krama Banjar Sapta Werdhi sané banget asihin titiang.

Om Swastyastu. Pinih ajeng lugrayang titiang nyinahang rasa pangayubagia majeng ring Ida Sang Hyang Widhi Wasa, duaning majanten sangkaning sih pasuécan-Ida mawinan pamargin pamilihan keliané inunian prasida mamargi antar miwah labdakarya.

Inggih, para manggala, prajuru, miwah krama banjar adat sané wangiang titiang. Kapertama, nénten lali titiang ngaturang suksma ping banget majeng ring Ida-dané sareng sami, utaminipun ring para sameton sané sampun suéca niwakang pilihan ring sikian titiang. Raris mantuk ring Ida-dané sané mapica suara (pilihan) ring caloné tiosan mangda nénten madué pikayunan nénten becik. Tegesnyané, mangda lascarya utawi legawa nerima kawéntenan puniki. Makasami mangda misadia nunggilang pikayunan ngaremba déwek titiang nglanturang pidabdab banjar druéné gumanti prasida molihang patitisé sané utama manut daging awig-awig banjar adat druéné.

            Kamanah antuk titiang, kawéntenan déwek titiangé nénten pacang wénten wigunannyané yéning nénten karemba antuk Ida-dané sareng sami. Napi malih kawewehin antuk katambetan titiangé sané risaksat sampun mapunya. Titiang naenan miragiang baos “Tatan Hana Wwang Sakti Sinunggil”. Kautaman banjar druéné pacang sida kamolohang yéning sayaga masareng-sareng ngamargiang saluir pidabdab lan pangrencana sané kajantenang.

            Salanturipun, banget pangaptin titiang, mangda nerus wénten piteket, pawarah, utawi kritik, lan tetimbang saking krama banjar sinamian. Taler mangda wénten saking para panglingsir miwah para sasepuh yata sulinggih utawi sang maraga wicaksana miwah pawiku, mangda lédang ngicenin titiang pamargi ri kala pacang ngénterang krama banjaré niténin wewangunan manut patitis lan pamikukuh banjar adat druéné. Punika sané jagi anggén titiang sepat siku-siku panuntun, miwah titi pangancan sajeroning ngupadi kahuripan banjar druéné kantos ka wekas.

Inggih, para manggala miwah ida-dané krama banjar sané pisinggihin titiang. Kocap kruna kelihan mateges duuran, wikanan, singgihan, miwah sang sané madué pangweruh utawi kawagedan pinaka pemimpin. Yadiastun titiang sampun kanggehang pinaka kelihan, majanten durung maderbé kaweruhan sané becikan utawi paripurna. Saluir kakirangan kantun mamurti ring sikian titiang. Duaning asapunika, majanten titiang durung prasida pinaka panuntun sané ngaturang tatuladan ring ida-dané krama sinamian. Nénten pisan wénten kawigunan déwék titiang yéning nénten polih dukungan utawi tuntunan saking Ida-dané sareng sami.

            Dadosnyané, indik kasujatian pikayunan Ida-dané sajeroning niténin pawangunan banjar druéné banget aptiang titiang. Duaning yéning nénten kadasarin antuk pikayunan sané sujati, majanten pacang méweh nagingin patitis banjar druéné molihang kahuripan sané trepti, sukerta, raharja, tur gemah lipah.

            Taler pangaptin titiang, ring patemon-patemon sané jagi rauh, mangda sayan jangkep pangrauh krama banjaré mawinan akéhan sané prasida nyarengin pabligbagan, ngamedalang pikayunan sané mabuat ring pawangunan. Mogi-mogi sangkaning punika, pawangunan banjar druéné sayan sida paripurna. Patemoné puniki tan péndah kadi unteng sejarah anyar sané ngwiwitin malih rasa sagilik-saguluk salunglung sabayantaka miwah paras-paros sarpana ya pinaka dasar molihang kasukertan banjar.

Inggih, Ida-dané miwah para prajuru banjar sané kasumayang Titiang. Kadi asapunika titiang prasida matur ring galahé puniki. Ripét makéh iwang atur panyembraman titiang, lédang Ida-dané ngampurayang. Inggih, puputin titiang antuk parama santih,

Om Santih, Santih, Santih, Om.