Inggih, Ida-dané, Para Atiti, miwah Sameton lanang-isteri sané wangiang titiang. Garjita dahat manah titiang saantukan sangkaning pasuécan-Ida Sang Hyang Widhi Wasa, titiang prasida kacunduk ring Ida-dané saha polih galah matur samatra rahinané puniki. Sadurung nglantur, lugrayang titiang ngastiti bakti ring Ida Hyang Widhi Wasa antuk ngojarang pangastungkara Om Swastyastu.

            Ring kahuripan sarahina, titiang miwah Ida-dané majanten kapatut setata sayaga nganggén busana. Yéning wénten anak anom utawi sampun lingsir nénten mabusana angan akidik ring marginé, janten pacang katarka wong édan utawi anak buduh. Tegesipun, nénten wénten jadmané pacang juari nénten mabusana.

           Sangkaning mabusana sané manut, jadmané pacang makanten becik, agung, ayu, miwah acreng. Sangkaning iwang mabusana taler wénten anaké ngemasin sungkan. Dadosnyané, ageng pisan jatinipun kawigunan busanané ring kahuripan druené sarahina. Sakéwanten yéning wénten anak mabusana nénten nganutin tata karma sané manut, majanten taler pacang ngwetuang salit arsa utawi nénten seneng sang sané ngatonang. Bilih-bilih induk busana adat Bali.

            Ring Indonesia, duaning panegara druéné kawangun antuk makudang-kudang pulau sané ageng-alit saha madué makudang-kudang suku bangsa saking adat maéndahanan, majanten taler pacang madué busana adat sané matios-tiosan. Wénten busana adat Bali, busana adat Sunda, busana adat Sasak, busana adat Bugis, miwah sané lianan.

            Ring Bali taler kadi asapunika. Krama adat Baliné sampun ketah pisan setata maparilaksana ngrajengang budaya Baliné. Busana sané lumrah kanggén ri kala nyanggra pakaryan dinas, majanten pacang matiosan ring busana kalaning nyangra pakaryan adat miwah agama. Upami ri kala pacang nglaksanayang upacara Déwa Yadnya, patut nganggén busana pamuspan, makadi wastra, kampuh, kuaca, miwah destar antuk anak lanang, raris wastra, kebaya, anteng, saha papusungan ring anak istri

            Busana-busana punika sajaba wastra, lumrahnyané mawarna sasrwa putih utawi kuning. Sakéwanten ri kala nyangra indik upakara pitra yadnya utawi pangabénan, ketah nganggén busana mawarna sarwa ireng utawi selem. Yéning kaupakarén ring upacara matatah utawi mawiwaha, kangkat nganggén bsuana payas madya utawi payas agung. Anaké sané pinaka pangayah utawi ri kala ngayah sadéréng pucak upacarané, lumrah krama Baliné mabusana adat madia. Sané lanang mawastra, maambed, miwah madestar batik, raris sané isteri nganggén taler busana adat madia saha nénten setata mapusungan.

Ida-dané sinamian sané wangiang titiang. Yéning wantah dados titiang mapinunas, ri jeroning sareng nitenin ngrajegang budaya Baliné, ngiring pada yatnain sareng-sareng mangda iraga sareng sami prasida mabusana sané kaucap patut nganutin tata krama adat miwah agama druéné. Mogi-mogi ja sangkaning mabusa sané manut punika sayan rajeg budaya Baliné. Mogi-mogi sangkaning pasuécan Ida Sang Hyang Widhi Wasa mawinan setata rajeg budaya druéné pinaka dasar molihang kahuripan pariwisata sané agung pinaka dasar molihang pangupajiwa.

            Inggih, kadi asapunika titiang prasida matur ring galahé sané becik puniki, mogi wénten pikenohipun. Manawi ta wénten atur titiangé sané nénten manut ring arsa, nénten lali titiang nglungsur agung rena pagampura. Pinaka pamuput, lugrayang titiang ngojarang parama santih. Om Santih, santih, Santih Om.