Ida-dané naenan ngwacén Tujuan Pendidikan Nasional? Inggih. Yéning manahang titiang, para guruné nénten pacang prasida mapakardi sané utama manut tetujon pendidikan punika, riantuk pikolih druéné dados guru nénten prasida anggén negepin napiluir sané kabuatang marupa kebutuhan pokok.

              Pendidikan nasionalé madue tetujon “Berkembangnya peserta didik beriman, taqwa terhadap Tuhan Yang Maha Esa, cerdas, terampil, berakhlak mulia, menjadi pribadi yang demokratis, serta penuh rasa tanggung jawab”. Punika mawinan pemerintah druéné nyobyahang program Wajib Belajar Sembilan Tahun. Tegesnyané, para alit-alité mangda sanistané masekolah sia warsa, kantos sanistané tamat SMP. Punika mapiteges, makasami putra-putri Indonesiané kapatut nglanturang masekolah, gumanti nénten kantun wénten sané buta aksara. Duaning asapunika, swadharman titiang miwah Ida-dané sayuakti abot pisan, ngwitin alit-alité uning matata krama manados anak alit sané suputra manut swadharmaning sisia ring aguron-guron.

              Manut teori tabularasa sané kamedalang antuk John Locke, raréné kabaos tan péndah kadi kertas putih sané puyung, sané durung madaging sesuratan. Duaning asapunika, para guruné ring tingkat TK miwah SD madué swadrahma ngorésang sasuratan ring kertasé punika, mangda ri wekasan prasida mapikenoh ring kahuripan maparajana. Yéning kertasé punika kagorésang tinta ireng, ipun pacang dados ireng, yéning gorésang antuk tinta emas, janten pacang makanten dados sasuratan emas, miwah sané lianan. Duaning asapunika, yéning mapikayun mangda alit-alité dados putra suputra tur mawiguna, majanten kualitas para guruné patut katincapang.

            Asapunapi mangda guruné madué kawruhan ring program rajeg Bali? Majanten para guruné patut malih nglimbakang utawi nincapang pangweruhané ring pendidikan formal. Tegesipun, sanistané guru TK-né mangkin madué ijazah S1 PAUD, mangda prasida manados guru TK sané profesional. Yéning asapunika, guru TK sané magajih wantah acengit patut nglanturang kuliah? Mangkin metu pitakén, Sira sané patut nanggung prabéa kuliahnyané? Puniki sané patut kauratiang olih sang maraga guru wisésa. Banget katuntut guru profesional nanging nasib utawi prabéa nénten kauratiang.

            Ida dané sinamian. Ring galahé sané becik puniki titiang tetap mapinunas majeng ring sameton guru makasami. Ngiring pikukuhin swadharma druéné manados guru sané becik, ngiring tincapang pangweruhan druéné indik budaya Bali mangda alit-alité benjangan prasida manados krama sané setata éling ring ngrajegang budaya Baliné riantuk Bali ngumandelang séktor pariwisata, saha nginggilang pariwisata budaya.

Salanturipun, matur sisip titiang majeng ring sang maraga guru wisésa, inggian sané ring pemerintah daerah miwah ring widang pendidikan. Yéning wantah dados titiang mapinunas mangda mikayunin indik upah minimum majeng ring guru-guru honor. Duaning yéning sampun polih honor sané agengan, janten pacang sayaga nglimbakang pangeweruhan ring pendidikan formal gumanti sanistané tamat S1 utawi D4.  Sampunang ngaptiang kualitas sané becik yening nafkah guruné nénten kalinguang. Yéning prasida, mangda satunggil guru TK utawi SD sané kayun nglanturang kuliah mangda molihang wantuan dana saking pemerintah.

Inggih, Ida dane miwah sameton guru sané wangiang titiang. Pinaka pacutetan atur titiangé ring galahé sané becik puniki, prasida katur kadio asapuniki. Guru TK madué swadarma sané abot nanging gajihnyané alit pisan. Mangda prasida pinaka guru profesional mabuat kawéntenang pararem indik upah minmal guru honor ring Bali. Guru-guru sané kayun kuliah S1 mangda kapicénin béasiswa saking pemerintah daerah.

Inggih, Ida dane sane banget wangiang titiang. Wantah kadi asapunika titiang prasida matur, mogi-mogi wénten pikenohnyané. Inggih, puputin titiang antuk ngojarang parama santih.

Om Santih, Santih, Santih, Om.