Om Swastyastu

Para Atiti miwah Ida-dané sané wangiang titiang, taler Para Sameton Siswané sané tresna asihin titiang. Pinih ajeng lugrayang titiang ngaturang pangayubagia majeng ring Ida Sang Hyang Widhi Wasa, duaning sangkaning asung kerta wara lugrahan-Ida, titiang prasida kacunduk ring Ida-dané sinamian ring rahinané mangkin. Ring galahé sané luihing utama puniki, titiang jagi matur samatra nganinin indik silih tinunggil upacara manusa yadnya, sané mamurda “Sasuduk Upacara Mapandes”.

Ida dané miwah Sameton sami sané pisinggihin titiang. Saking riin rauh mangkin krama Hindu Baliné bajeg pisan nglaksanayang upakara-upakara yadnya. Puniki kanggén cihna ngaturang pangubakti ring Ida Hyang Widhi Wasa. Sangkaning puniki agama Hinduné kabaos pinaka agama upakara. Upakara-upakara puniki taler sané mawinan budaya Baliné unik saha ngwetuang taksu adiluhung. Taksu puniki sané mawinan sayan ngakéhang kemanten krama dura negariné rauh malilacita ka Bali.

            Sajeroning kahuripan sarahina, krama Hindu Baliné bajeg nglaksanayang ajahan catur marga, inggih punika Jnana marga, Kria Marga, Bhakti Marga, miwah Yoga Marga. Pinaka larapan ngrajegang panglaksanan ajahan Bhakti Marga, krama Hinduné jemet nglaksanayang Panca Yadnya, inggih punika Dewa Yadnya, Rsi Yadnya, Pitra Yadnya, Manusa Yadnya, miwah Bhuta Yadnya.

Déwa Yadnya mateges astiti bakti saha mayadnya ring Ida Sang Hyang Widhi miwah ring para déwatané sami. Rsi Yadnya mateges astiti lan mayadnya ring para Rsi miwah sulinggih makasami. Pitra Yadnya mateges astiti bhakti lan mayadnya ring para leluhuré pinaka sang pitara. Bhuta Yadnya mateges mayadnya ring para bebhutan miwah gumatat-gumitité mangda jagaté rahajeng. Makalelima yadnyané punika sampun lumrah pisan kalaksanayang antuk umat Hinduné ring Bali.

Ida dané miwah Para sameton sané kusumayang titiang. Manut sastra agama Hinduné, upacara manusa yadnya kalaksanayang saking kahuripan i manusa kantun ring madianing garba kantos manusané lampus. Duaning asapunika wénten kabaos upacara magedong-gedongan,  wénten nyambutin, macolongan, nelubulanin, otonan, mapandes utawi matatah, pawiwahan, miwah pangabénan.

Mangkin ngiring baosang, napi minab sasuduk upacara matatah utawi mapandes punika? Matatah utawi mapandes kabaos upacara manusa yadnya sané maiketan ring mucehang karaksasan i manusa. Upacara matatah kalaksanayang ri kla krama Hinduné sampun kangken ngranjing ring yusa daha-teruni. Upacara puniki ketahnyané kalaksanayang sadurung marabian. Tegesipun, upacara puniki marupa tanggungan i rerama ring pratisentannyané. Yéning wénten krama Hinduné durung matatah tur sampun mawiwaha, ri kala reramannyané sida mitatahin adi miwah ponakannyané, ri kala punika kaselang mangda sareng matatah. Samaliha, yéning wénten krama Hinduné seda utawi padem sadurung matatah, upacara matatah kalaksanayang ri kala pangabénannyané.

Paindikan sasuduk upacara mapandes, wénten kasurat ring Kakawin Nitisastra sapuniki. Matatah utawi mapandes inggih punika upacara sané mapikenoh ngaonang sad ripu, inggih punika nenem mesehé sané mamurti ring anggan i manusa. Unteng panglaksanan upacara matatah puniki: Sakalané nyangihang patpat untu sariné miwah kalih untu taringé. Suksmanipun, mangda makanenem meseh uripé nénten kantun mamurti ring anggan i manusa.

            Makanenem mesehé punika nénten tios wantah Kama, Lobha, Krodha, Mada, Maha miwah Matsarya. Kama mateges pikayunan ngambekang kamomoan sajeroning kama-sanggama utawi nafsu birahi; Lobha mateges tamas, loba, momo ring arta brana; Krodha mateges sering gedeg, duka, brangti miwah mapikayunan dendam; Mada mateges seneng memadat, mamunyah, miwah mamotoh, tur kacanduan narkoba; Maha mateges bingung, sering ngembekang rasa iriati ring anaké tiosan.

Makanenem punika majanten parisolah sané kaon, sané mawinan manusané kasengsaran, nénten manggihin kasukertan. Punika sané kakaonang saking anggan krama Hinduné ri kala ngamargiang upacara mapandes, malarapan upakara sané nista, madia, miwah utama manut katatwaning sastra agama.

Ida-dané, Atiti, miwah Para sameton sané wangiang titiang. Ngiring cihnayang pikayunan druéné majeng ring parajanané sami! Bajegang nglaksanayang ajahan agama! Ngiring restitiang jagaté mangda prasida resik, santi, trepti, lan sukerta, mangda nénten kirangan pangan-kinum mawinan kabaos gemah lipah. Pikukuhin panglaksanan upacara mapandes sané kapercayin pacang prasida ngicalang daging pikayunan sané nénten becik, saha prasida ngaonang nénem mesehé sané kabaos sad ripu.

Inggih, Ida-dané sané gumanti banget wangiang titiang, taler para sameton sané asihin titiang. Kadi asapunika titiang prasida matur-atur ring galahé sané becik puniki, mogi-mogi wénten pikenohipun. Manawi ta wénten atur titiang sané nénten manut ring arsa, titiang ngalungsur agung rena pangampura. Ngiring puputin antuk parama santih. Om Santih, Santih, Santih, Om.