Sané kaping singgihin titiang Manggala STISPOL Wirabhakti Denpasar; Bapak-bapak miwah Ibu Dosén, taler Para Mahasiswa sané kasumayang titiang; Bapak-bapak tim panuntun basa Bali alus sané wangiang titiang; Miwah Ida-dané lan para pamilet tuntunan sané pisinggihin titiang. Om Swastyastu.

            Pangayubagia uningayang titiang majeng Ida Hyang Widhi Wasa, santukan wantah sangkaning asung kerta wara nugrahan Ida mawinan acara Tuntunan Basa Bali Puniki prasida kalaksanayang. Salanturnyané, lugrayang taler titiang ngaturang suksmaning manah ping banget pisan santukan lédang arsa mapaica wantuan genah lan srana tiosan mawinan acara puniki prasida kalaksanayang. Suksma banget taler majeng ring tim panuntun sané kamanggala olih Bapak Drs. I Nyoman Suwija, M.Hum. Nénten lali taler suksma banget mantuk ring para pamilet tuntunan sinamian riantuk sampun lédang ngrauhin parikramané puniki.

Ida-dané, Para Pamilet sané wangiang titiang. Nunas ampura ping banget titiang, duaning tepengan puniki titiang saking Lembaga Pengadbian Masyarakat (LPM) Universitas Udayana prasangga rauh pacang ngaturang tuntunan mabaos Bali majeng ring Ida-dané sareng sami. Titiang percaya mungguing Ida-dané para pejabat miwah mahasiwa sami katahan sané sampun biasa utawi sering mabaos Bali ring pambyaran miwah ring upacara adat miwah agama. Duaning asapunika menawi ta pangrauh titiang tan péndah kadi ngajahin bebek ngalangi, lédangang druénin sareng sami. Majeng ring Ida-dané sané sampun waged mabebaosan mangda ngangken acarané puniki pinaka galah nelebang malih. Raris majeng ring sané kantun kirang waged, mangda tuntunan puniki prasida kambil pikenohipun.

            Parikrama tuntunan basa Bali puniki wantah pinaka program unggulan ring Unud sané maiketan ring Diés Natalis Universitas Udayana warsa 2003 puniki. Napi mawinan asapunika? Duaning ring aab jagaté sané kabaos era globalisasi puniki, kantun akéh parajana suku Baliné, nénten purun utawi nénten kayun mabebaosan antuk Basa Bali alus. Punika duaning akéhan sané nénten pastika uning ring tatakrama mabaos sané patut.

            Yéning uratiang, kawéntenan basa Baliné sané mangkin sampun akéh keni ius utawi pengaruh saking basa tiosan minakadi bahasa Indonesia miwah basa asing. Yéning nénten iraga mangkin sareng sami mamiara, janten kasuén-suén basa Baliné pacang rered miwah padem. Yening basa Baliné rered, budaya Baliné taler pacang rered. Pradé budaya Baliné sampun rered tur padem, janten pariwisata Baliné nénten pacang rajeg malih. Yéning pariwisata Baliné nénten rajeg, kahuripan druéné ring Bali nénten pacang sukerta-santi. Duaning asapunika kedeh manah titiang ngiring Ida-dané mangda yukti-yukti kayun sareng malajahin basa Bali druéné. Raris ungkuran kayun sareng nglimbakang ring alit-alit miwah anom-anomé sané pacang nglanturang kantos ka wekas.

Ida-dané, para pamilet tuntunan sané kasumayang titiang. Kadi asapunika titiang prasida matur ring galahé puniki. Mogi-mogi nglantur pasuécan Ida Sang Hyang Widhi Wasa, mawinan parikrama tuntunan puniki prasida mangguhin karahajengan saha wénten pikenohipun. Malih apisan matur suksma banget, ampurayang pradé wénten atur titiangé sané nénten manut ring arsan. Pinaka pamuput atur, titiang ngojarang parama santih,

Om Santih, Santih, Santih, Om.